పండ్లు వాటిలోని పోషక విలువలు

మన దేశంలో చాలా పండ్లు సీజనల్‍గా లభిస్తుంటాయి. అయితే కొన్ని పండ్లు మాత్రం ఏ కాలంలోనైనా దొరుకుతాయి. చాలా మంది పండ్ల రసం అంటే వేసవి కాలానికే పరిమితమవుతుంటారు. అలా కాకుండా ఏ కాలంలో దొరికే ఆ పండ్లను తినడం వల్ల శరీరానికి కావలసినంత పోషక విలువలు లభిస్తాయి. అసలు ఏ పండులో ఏఏ పోషకాలు ఎంతెంత శాతంలో ఉంటాయో తెలుసుకుందాం.

కిడ్నీ స్టోన్స్‌ని, పొట్టని కరిగించే అనాసపండు

పచ్చని కూరగాయలు, ధాన్యాలు అలాగే పిండి పదార్ధాలను, పండ్లను తినడం వల్ల శారీరక శక్తి పెరుగుతుంది. దాంతోపాటు వ్యాధి నిరోధక శక్తి పెరగడం వల్ల ఆరోగ్యం మెరుగు పడుతుంది. పళ్ళన్నీ ముఖ్యమైనవే అయినా అనాసపండు ప్రత్యేకత కలిగినది. చక్కని రుచి, సువాసన కలిగిన అనాసపండు 85 శాతం నీటిని కలిగి ఉంది. దీనిలో చక్కెర నిల్వలు 13 శాతం, ధాతు శక్తి 0.05 శాతం, పీచు పదార్ధం 0.35 శాతం ఉన్నాయి. పైగా విటమిన్ ఎ, బి, సిలు కూడా ఉన్నాయి.